‘ஒப்பம்’: ஓர் அறிமுகம்

கதைக்குள் மூழ்குவதற்கு முன்
கொஞ்சம் பேசிவிடுவோம்!

ஜனவரி 21, 2021 அன்று ‘ஒப்பம்’ நாவலை முழுவதுமாக எழுதி முடித்தேன். ஆகஸ்ட் இறுதியில் எழுதத் தொடங்கி, தொடர்ந்து ஐந்து மாதங்கள் இந்த நாவல் எழுதுவதைத் தவிர்த்து வேறெந்த வேலையுமே நான் பார்க்கவில்லை. அணு நேரமும், கதைப் பற்றிய சிந்தனை, கதை நிகழ்வுகள் பற்றிய சிந்தனைகள் மட்டுமே நெஞ்சம் முழுக்க நிறைந்திருந்தது. அலைபேசியில் அவ்வப்போது நண்பர்களோடு உரையாடுவேன். அந்த உரையாடலும் இந்த நாவலைப் பற்றியதாக மட்டுமே இருந்தது. அப்படி இராபகலாக முழு ஆர்வத்தோடும் பெரும் சிரத்தையோடும் எழுதி முடித்த நாவலை சில காரணங்களுக்காக நான் உடனே வெளியிடவில்லை. செப்டம்பர் 19, 2022 அன்று அமேசான் கிண்டில் மின்னூலாகவே வெளியானது. 

‘ஒப்பம்’ நாவல் எதைப் பற்றியது?

புதிதாக பணிக்கு நியமிக்கப்பட்ட ஒரு கிராம அஞ்சல் அலுவலர், தன் அலுவலக  ஜன்னல் வழி தினம் காணும் கிராமத்தின் காட்சிகள், அந்த காட்சிகள் எழுப்பும் உணர்வுகள், அந்த உணர்வுகள் தூண்டும் சிந்தனைகள், அலுவலக மேசையில் அமரும்போது எழும் தார்மீகக் கேள்விகள், வாழ்வில் கனவுகளுக்கான இடம் மற்றும் இதற்கிடையில் அம்மா, காதலி போன்ற உறவுகளுடன் சிநேகமும் சிக்கல்களும்…  இப்படி யதார்த்தமான நிகழ்வுகளையும் சூழ்நிலைகளையும் கொண்டு இயற்றப்பட்ட ஒரு யதார்த்த வகை நாவல் தான் ‘ஒப்பம்’.   

‘ஒப்பம்’ நாவலின் கதாபாத்திரங்கள் மிக எளிமையானவர்கள். ஆனால், ‘ஒப்பம்’ சொல்ல நினைக்கும் கதை, முக்கிய கதாப்பாத்திரத்தின் பயணம் பற்றியதோ கிராமத்தின் கதை பற்றியதோ அல்லது தபால் துறையின் நிலவரம் பற்றியதோ மட்டுமல்ல; இவை மூன்றும் ஒருங்கிணைந்து நிஜத்தின் ஆழத்தை தோண்டி உண்மையை மிக அருகிலிருந்து வெளிச்சம் போட்டுக் காட்டும் கதை.  அயர்லாந்து எழுத்தாளர் ஜேம்ஸ் ஜாய்ஸ் இப்படிக் கூறுவார்:

என்னைப் பொறுத்தவரை, நான் எப்போதும் டப்ளின் பற்றியே எழுதுவேன். காரணம், டப்ளினின் இதயத்தைத் தொட்டுவிட்டால் போதும், நான் உலகின் எல்லா நகரங்களின் இதயங்களையும் தொட்டுவிடுவேன். குறிப்பிட்டதை அணுகுவதில் உலகளாவியதை அணுகமுடியும்.

‘ஒப்பம்’ நாவலை எழுதும்போது எனக்கு ஜேம்ஸ் ஜாய்ஸின் இந்த வார்த்தைகள் தான் மனதில் தோன்றின. இந்தியாவில் மொத்தம் 1,50,000க்கும் மேற்பட்ட அஞ்சலகங்கள் உள்ளன. உலகின் மிகப்பெரிய வலைப்பின்னலை இந்திய அஞ்சல் துறை கொண்டுள்ளது . இந்திய கிராமங்களின் தகவல் தொடர்புக்கும் சேமிப்புத் தேவைகளுக்கும், இந்திய நாடு முழுவதும் அஞ்சல் துறை தன் வேர்களை பரப்பியுள்ளது. அத்தகு முக்கிய, அதிகாரத்தின் கடைசி நுனி வரை சென்று செயல்படும் கிராம அஞ்சல் அலுவலகத்துக்கும், திருக்கோவிலூரின் மூன்று கிராமங்களுக்கும் இடையேயான உறவை கதையாக்குவதன் மூலம், சாமானிய மக்கள் எல்லோருடைய கதையையும் எளிதாக சொல்ல முடியும், என்ற நம்பிக்கையில் இந்த குறுநாவலை எழுதியிருக்கிறேன்.             

இனி கதை உங்களுடையது!

ஒப்பம் நாவலைப் பெற, கிளிக் செய்யவும் 👉: Get Your Kindle Copy! 

(Note: As an Amazon Associate I earn from qualifying purchases.)